રાજકોટ: હાલમાં દિવાળીનો તહેવાર ચાલી રહ્યો છે. ફટાકડા ફોડીને લોકો આ તહેવારની ઊજવણી કરી રહ્યા છે. ત્યારે ફટાકડાંના કારણે રાજ્યમાં અલગ અલગ જગ્યાએ આગ લાગવાની ઘટના બની છે.
રાજકોટમાં રેસકોર્સ ગ્રાઉન્ડ ખાતે ઊભેલી કારમાં ફટાકડાં ભરેલા હતાં અને અચાનક જ આગ લાગતા કાર ભડકે બળી હતી. આગે વિકરાળ સ્વરૂપ ધારણ કરતાં કાર સળગીને રાખ થઇ ગઇ ગતી. આ બનાવની જાણ થતાં જ ફાયર બ્રિગેડની ટીમ ઘટના સ્થળે પહોંચી ગઇ હતી અને આગ પર કાબૂ મેળવ્યો હતો. જો કે આ આગમાં કોઇ જાનહાની થઇ નથી.
જ્યારે બીજી બાજુ મોરબીના શનાળા બાયપાસ પાસે ટાયરના જથ્થામાં અચાનક આગ લાગી હતી. રાજકોટ રોડ તરફના રસ્તા પર કોમ્પલેક્ષ પાસે પડેલા ટાયરના જથ્થામાં આગ લાગી હતી. જોત જોતામાં આગે વિકરાળ સ્વરૂપ ધારણ કરી લેતા બાજુમાં પાર્ક કરેલા 2 ડમ્પર પણ આગની ચપેટમાં આવી ગયા હતા. આગની ઘટનાને પગલે સ્થળ પર લોકોના ટોળે ટોળા એકઠા થયા હતા. બનાવની જાણ થતાં જ ફાયર બ્રિગેડનો સ્ટાફ ઘટનાસ્થળે દોડી ગયો હતો અને ભારે જહેમત બાદ આગ પર કાબૂ મેળવાયો હતો. જોકે આગના કારણે ડમ્પર સળગીને રાખ થઈ ગયા હતા. આગ ફટાકડાના કારણે લાગી હોવાની શક્યતા સેવાઈ રહી છે.