પડોશી દેશ બાંગ્લાદેશમાં રૂ. 2000ની નકલી નોટોનું છાપકામ અને ભારતમાં તેની સપ્લાય શરૂ થઈ ચૂકી છે. આ ખુલાસાની સાથે દિલ્હી પોલીસના સ્પેશિયલ સેલે 2000 રૂપિયાની નકલી નોટોની સપ્લાય કરનારા 'કિંગપિન'ની ધરપકડ કરી હોવાનો દાવો કર્યો છે. તેની પાસેથી 6.60 લાખ રૂપિયાની નકલી નોટો મળી છે. તમામ 2000 રૂપિયાની નોટોનું છાપકામ એટલું આબેહૂબ છે કે અસલી-નકલીમાં ફર્ક કરવો સરળ નથી.
ભારતમાં 2000 અને 500ની નવી નોટ લાવવા માટેનું એક મહત્વનું કારણે 1000 અને 500ની જૂની નોટો સફાયો કરવાનો હતો. આવામાં રૂ. 2000ની નકલી નોટોનો બજારમાં પેસારો ચિંતાનું કારણ છે. છેલ્લા બે મહિનામાં ઘણી જગ્યાએ 2000ની નકલી નોટોની ખેપ પકડાઈ ચૂકી છે.
સ્પેશિયલ સેલના DSPએ કહ્યુ કે લગભગ 1 મહિનામાં પોલીસે જહીરુદ્દીન સહિતના 2 લોકોને નકલી નોટોની સાથે ધરપકડ કરી છે. તેમની પાસેથી રૂ. 6.50 લાખની નકલી નોટો રિકવર થઈ હતી. તમામ રૂ. 2000ની નોટો હતી. આ નોટોને જોઈને સુરક્ષા એજન્સીઓ પણ ચોંકી ગઈ છે. આ નવી નોટોનું પણ આબેહૂબ છાપકામ થઈ રહ્યું છે. બંને આરોપીઓની પૂછપરછમાં કિંગપિન કાશિદ નામની વ્યક્તિની મુખ્ય સંડોવણી હોવાનું બહાર આવ્યું છે જે માલદાનો રહેવાસી છે.બંને આરોપીઓ કિંગપિન પાસેથી નકલી નોટોની ખેપ લઈને આવતા હતા. પોલીસ ત્યારથી જ કાસિદની શોધમાં હતી. ગુરુવારે તેની દિલ્હીમાં ધરપકડ કરવામાં આવી હતી. તેણે જ ખુલાસો કર્યો હતો કે તેને નકલી નોટોની ખેપ બાંગ્લાદેશમાંથી મળી રહી હતી. તેને દિલ્હી સુધી નોટોની સપ્લાય માટે સપ્લાયરની શોધ હતી. બંને સાથીની ધરપકડ થવાને કારણે તેમને દિલ્લી લઇ આવ્યામાં હતા.