ચૂંટણીપંચનો નવતર પ્રયોગ બુથના નકશા માટે ગુગલ મેપિંગની મદદ લેવાશે

ગાંધીનગરઃ ગુજરાત વિધાનસભાની ચૂંટણીને લઈને મતદારોની સરળતા માટે ચૂંટણીપંચે નવતર પ્રયોગ હાથ ધર્યો છે. મતદાર સ્લીપમાં બુથના સરનામા સાથે નકશો મુકાશે. 50 હજારથી વધુ મથકોના નકશા માટે ગુગલ મેપિંગની મદદ લેવાશે. ચૂંટણીના એક અઠવાડીયા અગાઉ મતદાર સ્લીપ મળશે.આગામી 25મી સપ્ટેમ્બરે આખરી મતદાર યાદી પ્રસિદ્ધ કરાશે. વર્ષ 2012ની સરખામણીમાં 2017માં 52.45 લાખ મતદારો વધ્યા છે.

માત્ર જાન્યુઆરીથી સપ્ટેમ્બર સુધી 15.40 લાખ મતદારો ઉમેરાયા છે. મતદાન મથકો 44 હજાર 579થી વધારીને 50 હજાર 120 કરાયા છે. શહેરોમાં 1 હજાર 400 મતદારો દીઠ એક મતદાન મથક નિયત કરાયુ છે. ગ્રામ્ય વિસ્તારોમાં 1 હજાર 200 મતદારો દીઠ મતદાન મથક નિયત કરાયા છે.

વિકલાંગો માટે વ્હીલ ચેર સહિતની સુવિધા ઉપલબ્ધ કરવામાં આવશે. પોલીંગ સ્ટાફ દ્વારા વિકલાંગોને તમામ સહાયતા કરવામાં આવશે. મતદારોના જાતિ રેશીયામાં પણ નોંધપાત્ર વધારો થયો છે. મતદાર યાદીમાં 2.25 કરોડ પુરૂષ 2.07 કરોડ સ્ત્રી મતદારો થયા છે. 2012ની ચૂંટણી વખતે જાતિ રેશીયો 910 હતો. 2017માં જાતિ રેશીયો 920 થયો છે.