વલસાડઃ દેશભરમાં ચોટલી કપાવાની ઘટનાઓ બની રહી છે. ત્યારે ગુજરાતના વલસાડમાં એક આદિવાસી વિસ્તાર ધરમપુરમાં બીજી ઘટના બની છે. થોડા દિવસ અગાઉ એક મહિલાનો ચોટલો કપાયો હતો અને હવે બીજી ઘટના બની છે જેમાં એક છોકરીની ચોટલી કપાવાની ઘટના સામે આવી છે. ધરમપુર તાલુકાના ઓઝરપાડાની એકલવ્ય શાળામાં ભણતી અને છાત્રાલયમાં રહેતી 13 વર્ષની વિદ્યાર્થીનીની રાત્રી દરમિયાન ચોટલી કપાઇ ગઇ હતી. જેને લઇ છોકરી આઘાતમાં મુકાઇ ગઇ હતી.
છોકરીના જણાવ્યા અનુસાર જ્યારે તે રાત્રે સુતી હતી ત્યારે એને ભયાનક સપનું આવ્યું. સપનામાં તેના વાળ ખેંચાયા હતા અને છાપરા ઉપર અવાજ આવ્યો હતો. જ્યારે તે સવારે જાગી તો તેના વાળ કપાયેલ મળ્યા. અને છોકરી આઘાતમાં મુકાઇ ગઇ. ગભરામણને લઇ છોકરીને સારવાર માટે હોસ્પિટલ લઇ જવાઇ હતી. સાથોસાથ તેના પિતા દ્વારા ધરમપુર પોલીસ સ્ટેશનમાં અરજી લખવામાં આવી હતી. આ ધરમપુર વિસ્તારની ચોટલી કપાવાની બીજી ઘટના છે.