ભાજપ દ્વારા 70 ઉમેદવારોની યાદી જાહેર કરાયા બાદ હવે કોંગ્રેસે પણ પોતાના ઉમેદવારો જાહેર કરવા માટે કવાયત હાથ ધરી હતી. જેના માટે દિલ્લી ખાતે કોંગ્રેસ ક્રીનિંગ કમિટીની બેઠક મળી હતી. દિગ્ગજ નેતાઓની મળેલી આ બેઠકમાં ફાઈનલ ઉમેદવારોના નામ નકકી કરવા માટે ચર્ચા હાથ ધરાઈ હતી. ભાજપને પગલે હવે કોંગ્રેસ પણ પ્રથમ તબક્કાના ઉમેદવારોના નામની યાદી આજે જાહેર કરે તેવી શક્યતા છે.
આ યાદી આજે જ જાહેર થાય તેવી સંભાવના છે. અશોક ગેહલોતના જણાવ્યા મુજબ હાલ એનસીપી અને જેડીયુ સાથે વાતચીત ચાલી રહી છે. થોડા દિવસમાં યાદી જાહેર થઈ જશે.
જો કે આ યાદીને લઇને કોંગ્રેસ હાઇકમાન્ડ મૂંઝવણમાં છે. કેમ કે હાર્દિક અને અલ્પેશની ટિકીટની માંગણીને લઇને કોંગ્રેસના દિગ્ગજો મુશ્કેલીમાં મુકાયા છે. ટિકીટની ફાળવણીને લઇને ગુંચવણ ઊભી થઇ છે. કેમ કે બંનેએ વધુ ટિકીટની માંગણી કરતાં આ ગુંચવણ ઊભી થઇ હોવાનું જાણવા મળ્યું છે.
નોંધનીય છે કે ગુજરાત વિધાનસભાની ચૂંટણી હવે નજીકના દિવસોમાં આવી રહી છે. ભાજપ અને કોંગ્રેસ દ્વારા તાડામાર તૈયારીઓ શરૂ કરી દેવામાં આવી છે. ત્યારે ભાજપે ચૂંટણી માટેના પોતાના 70 જેટલા ઉમેદવારોની યાદી શુક્રવારે જાહેર કરી હતી. જેના પગલે આજે કોંગ્રેસ પ્રથમ તબક્કાની યાદી જાહેર કરી શકે છે.