હિંમતનગરઃ કરોડો કમાવાની લાલચમાં ક્યારેક આપણે મહેનતથી કમાયેલા નાણાં મહાઠગના હાથમાં આપી દેતા હોઈએ છીએ. ક્યારેક એવું પણ બનતું હોય છે કે નાણાંની લાલચ જ એવી આપવામાં આવે છે કે આપણી તનતોડ મહેનતની કમાણી આપણે આવા મહાઠગોના હવાલે કરી દેતા હોઈએ છીએ. આવા જ એક મહાઠગની આજે આપણે વાત કરીશું. આ મહાઠગ હિંમતનગરનો છે મુળ રાજસ્થાનના આ વતનીનું નામ છે મનીષ શાહ. શગુનના નામે કંપનીઓનું જાળું બનાવ્યું અને લોકો પાસેથી નાણાં ઉઘરાવ્યા.
માત્ર 30 મહિનામાં ડબલ કરવાની સ્કીમ લોંચ કરી. એજન્ટને જોડયા અને આ એજન્ટોએ લાલચ આપીને નિર્દોષ લોકોના કરોડો રૂપિયા ઉઘરાવ્યા. આપણી અર્થવ્યવસ્થામાં એવો કોઈ જાદુ નથી કે તમારા નાણાં કોઈ જગ્યાએ કોઈ કંપની રોકે અને તમને 30 મહિનામાં આવું બંપર વળતર મળે. છતાં નાણાંના લોભમાં આવીને આવા મહાઠગને કમાણી ધરી દેતા છેવટે એ રૂપિયા ખોવાનો વારો આવે છે. આવા જ એક છેતરપીંડીના કેસ વિશે પોઝીંય સ્કીમના મહાઠગમાં આપને વિગતે જણાવીએ.
પહાડોની વચ્ચે તમને કોઈ પ્લોટ આપવાની વાત કરે તો? એ પ્લોટ ધરોઈ ડેમની નજીક હોય અને બાજુમાં જ સેવન સ્ટાર રિસોર્ટ હોય. તમને બાંયેધરી આપવામાં આવે કે તમે ખરીદેલો પ્લોટ કુદરતી સાનિધ્યમાં હશે તો તમે ચોક્કસ લલચાશો. આ લાલચમાં આવીને હજારો લોકોએ નાણાં રોક્યા અને થઈ છેતરપીંડી. તમારી મહેનતની કમાણીના નાણાં ચાંઉ કરી જનારા આ શખ્સનું નામ મનીષ શાહ છે. જેની સામે CID ક્રાઈમમાં ફરિયાદ દાખલ કરવામાં આવી છે.
શગુન બિલ્ડ સ્કવેયર અને શગુન એગ્રી સ્પેસ સામે થયેલી ફરિયાદો વધારે ગંભીર હતી. વીટીવીને પણ તેમાં છેતરાયેલા નિર્દોષ લોકોના કોલ મળી રહ્યાં હતા. જેના કારણે વીટીવીની ટીમ આ મામલાની ખરાઈ કરવા માટે પહોંચી હતી.
વીટીવીનું ઈન્વેસ્ટીગેશન
હજારો લોકોની સાથે કરોડો રૂપિયાની છેતરપીંડી કરનારા મનીષ શાહની લાઈફ સ્ટાઈલ વૈભવશાળી છે. બોલીવૂડની હસ્તીઓ સાથે મિત્રતાએ મનીષનો શોખ છે. મનીષની પાર્ટી અને ઉદ્ઘાટનો બોલીવૂડની આ સેલીબ્રીટીઝ સિવાય અધૂરા હોય છે.
શગુનના નામે કંપનીઓ ચલાવતા મનીષના નાણાં ઉઘરાવવાનું કામ તેના એજન્ટ કરતા હતા. ભોળા રોકાણકારોને ફસાવવા માટે મનીષે જે એજન્ટ તૈયાર કર્યા હતા અને આ એજન્ટ લોકોને ફસાવતા હતા.
વીટીવીની ટીમે મનીષ શાહની મોડસ ઓપરેન્ડી જાણવા માટે એક એજન્ટ સાથે વાત કરી. ભાઈલાલભાઈ નામના આ એજન્ટે અમારી ટીમને કહ્યું કે મેં મારા મિત્રો અને સગા-વ્હાલાને શગુનમાં રોકાણ કરાવ્યું છે.