BJP એ મને કરોડોની કરી ઓફર કોંગ્રેસના આ ધારાસભ્યએ કર્યો ઘટસ્ફોટ

ગુજરાતમાં ચુંટણીનો માહોલ જામ્યો છે. દરેક રાજકિય પક્ષ દ્વારા ચુંટણી લક્ષી વિવિધ જાહેરાતો કરીને ગુજરાતના મતદારોને પોતાના પક્ષને જીતાડવા માટે ખાસ પ્રયાસો કરી રહ્યા છે ત્યારે ગુજરાતના પાલનપુર નજીક આવેલ નેનાવા ગામે ચુંટણી લક્ષી યોજાયેલ એક બેઠકમાં કોંગ્રેસના સંભવિત ઉમેદવારોની યાદીમાં નોંધાયેલા એક કોંગ્રેસી ધારસભ્યએ ગુજરાતના સત્તાધારી પક્ષ ભાજપ પર એક મોટો આક્ષેપ કર્યાનું સામે આવતા ગુજરાતના રાજકારણમાં ગરમાવો ફેલાઇ જવા પામ્યો હતો.  

આગામી ચુંટણીમાં કોંગ્રેસના સંભવિત ઉમેદવારની યાદીમાં સ્થાન ધરાવતા પાલનપુરના ધાનેરાના ધારાસભ્ય જોઇતાભાઇ પટેલે એક સભામાં મોટો ધડાકો કરતા જણાવ્યુ હતુ કે ગુજરાતમાં જ્યારે પુરની સ્થિતિ હતી તે સમયે પક્ષના કહેવા મુજબ અમે કેટલાક ધારાસભ્યો ગુજરાત બહાર હતા ત્યારે ભાજપ દ્વારા 35 કરોડ રૂપિયા લઇને મારા દિકરા પાસે આવ્યા હતા અને મને ખરીદવાની ઓફર કરવામાં આવી હતી. પરંતુ અમે તે રૂપિયા ઠુકરાવ્યા હતા. 

ઉલ્લેખનીય છે કે આગામી સમયગાળામાં ગુજરાત વિધાનસભાની ચુંટણી નજીક આવી રહી છે ત્યાર પોતાના વિસ્તારના મતદારોની વચ્ચે જઇને લોકસંપર્ક અભિયાન પીઢનેતા દ્વારા શરૂ કરવામાં આવ્યુ છે. ત્યારે જનસંપર્ક અભિયાન અંતર્ગત ધાનેરાના સંભવિત ઉમેદવાર જોઇતાભાઇ પટલે એક બેઠકમાં આ વાત ગ્રામજનો વચ્ચે કરતા ખળભળાટ મચી જવા પામ્યો હતો. ગ્રામજનો પૈકી એક વ્યક્તિએ કોંગ્રેસના ધારાસભ્ય જોઇતાભાઇ પટેલને પુર સમયે તમે ક્યાં હતા તેવો પ્રશ્ન પણ પુછતા તેમણે જવાબ વાળ્યો હતો કે પક્ષના આદેશ અનુસાર તે સમયે મારે બેંગલોર જવુ પડયુ હતુ.