અરવલ્લીઃ સામાન્ય રીતે ચોમાસુ ગયા બાદ શિયાળાની ઋતુમાં પાણીના સ્તર દરેક જગ્યાએ ઊંચા આવતા હોય છે. બોર-કુવામાંથી લોકો પાણીનો ઉપયોગ કરતા હોય છે. ત્યારે મેઘરજ તાલુકાના અંતરિયાળ એવા ભૂતિયા ગામે ભરશિયાળે પ્રજાજનો પાણી માટે વલખા મારી રહ્યાં છે. થરથરથી ઠંડીમાં પાણી માટે 1 કીલોમીટર દૂર ચાલીને જવું પડે છે.
ભૂતિયા ગામમાં ખેતી અને પશુપાલનના વ્યવસાય પર નભતા 700થી વધુ લોકો વસવાટ કરે છે. ગામમાં છેલ્લા 3-4 વર્ષથી પાણી સમસ્યા માથાનો દુખાવો બની ગયો છે. તંત્ર દ્વારા તૈયાર કરવામાં આવેલી પાણીની ટાંકી અને હેન્ડપમ્પ હાલ શોભાના ગાંઠિયા સમાન છે. ગામ લોકો દ્વારા સરપંચ અને મેઘરજ તાલુકા પંચાયતમાં અનેક વખત રજૂઆત કરી પણ તંત્રના બહેરા કાનને ગ્રામજનોની સમસ્યા સંભળાતી નથી.
ત્યારે ગ્રામજનોની પાણી સમસ્યા ઝડપથી હલ થાય એવી માંગ રહેલી છે. જો આગામી સમયમાં પાણીની સમસ્યા હલ નહિ થાય તો ગ્રામજનોએ આંદોલનનો માર્ગ અપનાવવાની ચીમકી ઉચ્ચારી છે.
પાણીની અછત કારણે નાના બાળકોનો અભ્યાસ પણ બરબાદ થાય છે. રોજગારી અર્થે પણ જઇ શકાતું નથી. ગ્રામજનોને પીવાના પાણીની સમસ્યા છે ત્યારે પશુઓ નું તો કહેવું જ શું? પશુઓને પણ તરસે મારવાનો વારો આવે તેમ છે. પશુઓ માટે ગામમાં હવાડા બનાવ્યા છે પણ પાણીના હોવાને કારણે હવાડા પણ ખાલીખમ છે. ત્યારે હાલ કકડતી ઠંડીમાં ગ્રામજનોની પાણી સમસ્યાની રઝળપાટથી દયનિય પરિસ્થિતિ જોવા મળે છે. ત્યારે મહિલાઓની પાણી સમસ્યા ઝડપથી હલ થાય એવી માગ રહેલી છે.
રામગઢી ગ્રામપંચાયત હેઠળના ભૂતિયા ગામની પાણી સમસ્યા બાબતે મેઘરજ તાલુકા વિકાસ અધિકારીને સવાલો પૂછવામાં આવ્યા હતા. તેઓએ જણાવ્યું હતું કે ભૂતિયા ગામની પાણી સમસ્યા બાબતે પાણી પુરવઠા વિભાગમાં જાણ કરીને પાણીના પ્રશ્નો ઝડપથી હલ થાય એવા પ્રયત્નો કરવામાં આવશે. ત્યારે હાલ ગામમાં જે જે હેન્ડપંપ બંધ છે તેને પણ રીપેર કરાવી શરુ કરવામાં આવશે એવી મીડિયા સમક્ષ ખાતરી આપી હતી.