અમદાવાદ: ગાંધીનગર કમલમ ખાતે બેઠક બાદ મોડીરાતે અમિત શાહએ બેઠકનો દોર યથાવત રાખ્યો. શુક્રવારે મોડી રાતે તેઓ અમદાવાદ મીડિયા સેન્ટર ખાતે પહોચ્યા હતા જ્યા પ્રદિપસિંહ જાડેજા ભુપેન્દ્ર યાદવ ભાજપ પ્રદેશ અધ્યક્ષ જીતુ વાઘાણી તથા ભાજપના આગેવાનો સાથે બેઠક કરી હતી.
બેઠકમાં આગામી દિવસોમાં ભાજપના ઉમેદવારોની બીજી યાદી તથા ગુજરાતમાં રાજકીય પરિસ્થિતિને ધ્યાને રાખી રણનિતી અંગે ચર્ચા કરી હતી.
ઉલ્લેખનીય છે કે ગઇકાલે ભાજપે પોતાના 70 ઉમેદવારોની યાદી જાહેર કરી હતી. હજુ પણ ઘણી બધી સીટના ઉમેદવારો જાહેર કરવાના બાકી છે. ત્યારે તે વિષય પર પણ મહામંથન કરવામાં આવ્યુ હતુ.
ગુજરાતના સત્તાધારી પક્ષ ભાજપે 2017 ની ચુંટણી જીતવામાં માટે ખાસ કમર કસી છે ત્યારે આ તરફ કોંગ્રેસ અને અન્ય પક્ષો દ્વારા પણ આગામી સમયે ગુજરાતમાં પોતાની સરકાર બનાવવા માટે પ્રચાર-પ્રસાર પણ શરૂ કરી દીધો છે.
ભાજપના મીડીયા સેન્ટરમાં રાષ્ટ્રીય અધ્યક્ષ અમિતભાઇ શાહની ખાસ ઉપસ્થિતીમાં યોજાયેલી આ બેઠકમાં ખાસ કરીને જાહેર કરાયેલ ઉમેદવાર તથા પાર્ટીના પ્રચાર-પ્રસારને લઇને ખાસ ચર્ચા કરવામાં આવી હતી. જેમાં ગુજરાત ભાજપના દિગ્ગજ નેતાઓ ઉપસ્થિત રહ્યા હતા.
અત્રે જણાવી દઇએ કે 2017 માં ભાજપે આશરે 49 જેટલા ઉમેદવારોને રિપીટ કરેલા છે તથા કેટલીક સીટ પર કેટલાક દિગ્ગજ નેતાને ટિકીટ આપવામાં ના આવતા અસંતોષનો જુવાળ ઉભો થયો હતો.