અમદાવાદ: વડાપ્રધાન નરેન્દ્ર મોદી અને જાપાનના વડાપ્રધાન શિન્ઝો એબેના આગમનની ઘડીઓ ગણાઇ રહી છે ત્યારે અમદાવાદના કેટલાક વિસ્તારોમાં મોડી રાત્રે ગાજવીજ સાથે ધોધમાર વરસાદ તૂટી પડતાં તંત્ર દોડતું થઇ ગયું છે. હવામાન વિભાગની આગાહી અનુસાર આગામી બે દિવસ મધ્યમ જ્યારે ૧૪-૧૫ સપ્ટેમ્બરના અતિભારે વરસાદની આગાહી કરવામાં આવી છે.
સામાન્ય રીતે અમદાવાદમાં બે ઈંચ વરસાદમાં પણ પાણી ભરાય તો પણ અમદાવાદ મ્યુનિસિપલ કોર્પોરેશનના અધિકારીઓ રસ્તા પર ઉભા રહીને ખડેપગે ફરજ અદા કરતા જોવા મળતા નથી. પરંતુ હવે જ્યારે મોંઘેરા મહેમાનોનું આગમન થઇ રહ્યું છે અને અમદાવાદના મેકઓવર માટે કરોડો રૃપિયાનો ખર્ચ થયો છે ત્યારે કોર્પોરેશનના અધિકારીઓ મોડી રાત્રે પણ દોડતા થઇ ગયા હતા. અમદાવાદના અનેક બ્રિજ પર રંગબેરંગી લાઇટ્સ લગાવવામાં આવી છે અને રિવરફ્રન્ટ ઉપર રવિવાર રાતથી જ લેસર શો શરૃ કરી દેવામાં આવ્યો હતો. વરસાદ પડતાં આ તમામ સજાવટ ઉપર પાણી ફરી વળ્યું છે. અમદાવાદના અનેક માર્ગો પર જાપાનના વડાપ્રધાન શિન્ઝો એબેને આવકારતા હોર્ડિંગ્સ પણ લગાવવામાં આવ્યા છે. આ ઉપરાંત બંને દેશના વડાપ્રધાનના રોડ શો માટે પણ એરપોર્ટથી ગાંધી આશ્રમ સુધી સજાવટ કરવામાં આવેલી છે. હવે વરસાદ પડવાને લીધે તંત્ર માટે રાત થોડીને વેષ ઝાઝા જેવી પરિસ્થિતિ સર્જાઇ જવાની છે.
અમદાવાદમાં આજે દિવસભર ઉકળાટ રહ્યો હતો અને પરંતુ રાત્રે વિજળીના કડાકા-ભડાકા સાથે વરસાદ તૂટી પડયો હતો. આજે અમદાવાદમાં ૩૬ ડિગ્રી ગરમી નોંધાઇ હતી જ્યારે ૩૬.૪ ડિગ્રી સાથે સુરત-ડીસામાં સૌથી વધુ સરેરાશ મહતમ તાપમાન નોંધાયું હતું.