કચ્છઃ પોલીસ પર હુમલો કરનાર આરોપી આખરે પોલીસની પકડમાં આવી ગયો છે. પોલીસ પર હુમલો કરી નાસતો-ફરતો આરોપી કાસમ ગઢશીશા નજીક ડુંગરાળ વિસ્તારમાં છુપાઈને બેઠો હતો. જે અંગે પોલીસને બાતમી મળતા છટકું ગોઠવી પોલીસે તેને ઝડપી પાડયો છે. તો આપને જણાવી દઈએ કે આરોપી કાસમે કચ્છ પોલીસની ટૂકડી પર બે વખત જીવલેણ હુમલો કર્યો હતો.
ઉલ્લેખનીય છે કે સતત બીજી વખત પોલીસ પર થયેલા હુમલાના બનાવને લઇ ચર્ચા જાગી હતી. જુનાગઢ જેલમાંથી છુટેલા નખત્રાણાના કાસમ નોતીયાર નામનો આરોપી ૨૦ દિવસ પહેલા ભુજમાં ત્રણ પોલીસ કર્મીઓ ઉપર છરી વડે હુમલો કરી નાસી છુટયો હતો. તે કાસમને પકડવા માનકુવા-(ભુજ) પોલીસ સ્ટેશનના ૧૦ કર્મીઓને ટીમે ગઇકાલે ભુજના વટાછડ ગામમાં કાસમ નોતીયારને ઘેરીને પકડવા જાળ બીછાવી હતી.
પરંતુ ફરી એકવાર આરોપી કાસમ પોલીસને પછાડી અને ૧૦ પોલીસની ટીમ ઉપર કુહાડી વડે હુમલો કરીને કોન્સ્ટેબલને ઇજા પહોચાડવા પ્રયાસ કર્યો હતો. પરંતુ પોલીસે ગોળીબાર કરતા ગભરાઇને કાસમ નોતીયાર નાસી છુટ્યો હતો. ફાયરીંગના કારણે પોલીસ કોન્સ્ટેબલનો જીવ બચી ગયો હતો. આ અંગે માનકુવા પોલીસ સ્ટે.માં ફરિયાદ લખાવાઇ હતી. પરંતુ બબ્બે વાર પોલીસ પાર્ટી ઉપર હુમલો કરી નાસતો-ફરતો કાસમ ગઢશીશા નજીક ડુંગરાળ વિસ્તારમાંથી આખરે ઝડપી પાડવામાં આવ્યો હતો.