વડોદરા: ગુજરાતમાં દિવસે દિવસે ક્રાઈમની ઘટનામાં વધારો થતો જોવા મળી રહ્યો છે. કાયદા અને વ્યવસ્થાની સ્થતિ ક્યાંક કથળતી હોય તે નજરે પડી રહ્યું છે. વડોદરા સિટીમાં એક સાથે 6 ATM મશીન તોડવામાં આવ્યા હોવાની માહિતી પ્રાપ્ત થઇ છે.
આ અંગે મળતી માહિતી અનુસાર વડોદરામાં એક જ રાતમાં એક સાથે 6 ATM મશીન તોડવામાં આવ્યા છે. આ 6 ATMમાંથી લૂંટાયા તો 15 લાખ પણ પોલીસના રાત્રી પેટ્રોલિંગ પર 15 કરોડના સવાલ ઉભા થયા છે. તસ્કરોને એવો સમય મળ્યો કે કાયદેસર ગેસ કટરથી ATM તોડયા CCTV ફુટેજમાં આ મહાચોર ગેસ કટર માટે તાર ખેંચી રહ્યાં છે. આજવા રોડ પર બેન્ક ઓફ બરોડાનું ATM તોડતા કેટલાક લોકોએ ચોરને જોયા પણ ખરા.
શહેરના મકરપુરા વડસર તરસાલી શરદનગર અને માંજલપુર વિસ્તારના જે ATM તુટયા છે તેની મોડસ ઓપરેન્ડી એક સમાન છે. ગેસ કટરથી ATMની કેશપેટી તોડી અને રોકડ ઉપાડીને આ મહાચોર ગુમ થઈ ગયા. સંસ્કારી નગરીની આ ચોરી કેટલાક સવાલ ઉભા કરે છે.
જો કે પોલીસ એ પણ અનુમાન લગાવી રહી છે કે ATM તોડ આ ગેંગ રાજસ્થાનથી આવી છે. મહાચોર જે વાહન લઈને આવ્યા હતા તેની તપાસ થઈ તો વાહનનો નંબર જ ખોટો હોવાનો ખુલાસો થયો છે. પોલીસે તેની આબરૂના ધજાગરા કરતી આ ગેંગને શોધવા આકાશ પાતળ એક કર્યા છે હવે સવાલ એ છે કે આ ગેંગ ક્યાં સુધી પોલીસના શકંજાથી દુર રહેશે?