મોગાદિશુઃ સોમાલિયાની રાજધાની મોગાદિશુમાં થયેલા અત્યાર સુધીના સૌથી શક્તિશાળી બ્લાસ્ટમાં મૃત્યુઆંક વધીને 276 પર પહોંચી ગયો છે. જ્યારે 300થી વધુ લોકો ઘાયલ થયા છે. મૃતકોની સંખ્યામાં હજુ પણ વધારો થાય તેવી શક્યતા છે. તો બીજી તરફ તુર્કી અને કેન્યા સહિતના કેટલાક દેશએ સ્વાસ્થ્ય સહાય માટેની રજૂઆત પણ કરી છે.
વિદેશ મંત્રાલય સહિત મહત્વપૂર્ણ મંત્રાલયની નજીકના વ્યસ્ત વિસ્તારને નિશાન બનાવીને વિસ્ફોટક ભરેલા ટ્રકને બોંબથી ઉડાવવામાં આવ્યો હતો. આ ઘટના બાદ સોમાલિયા સરકારે હુમલાને રાષ્ટ્રીય દુર્ઘટના જાહેર કરી છે. અને અલ-કાયદા સાથે જોડાયેલા આતંકી સંગઠન અલ-શબાબને આ હુમલા માટે જવાબદાર ઠેરવ્યું છે. જોકે હજુ સુધી આ હુમલાની જવાબદારી એક પણ આતંકી સંગઠને સ્વીકારી નથી.