લીબિયાના બેંગાજી શહેરમાં કાર બોમ્બ બ્લાસ્ટથી 27નાં મોત 30થી વધુ ઘાયલ

લીબિયાના બેંગાજી શહેરની એક મસ્જિદની બહાર થયેલા બે કાર બોમ્બ બ્લાસ્ટમાં ઓછામાં ઓછા 27 લોકોના મોત થયાં છે અને 30થી વધારે લોકો ઘાયલ થયા છે. મંગળવારે રાતે થયેલા આ બ્લાસ્ટમાં મરનાર લોકોની સંખ્યા વધે એવી આશંકા વ્યક્ત કરવામાં આવી છે. જો કે હજુ સુધી કોઇ સંગઠને આ ઘટનાની જવાબદારી લીધી નથી.

બેંગાજીમાં સેના અને પોલિસદળના પ્રવક્તા કેપ્ટન કતારેક અલ્ખારાજે જણાવ્યું કે પહેલો વિસ્ફોટ રાતે આશરે 8:20 વાગ્યે આવાસીય સલમાની વિસ્તારમાં થયો. જ્યારે સ્થાનિક લોકો અને મેડિકલ સ્ટાફ ઘાયલોને હોસ્પિટલ લઇ જતાં હતાં ત્યારે બીજો બોમ્બ બ્લાસ્ટ થયો હતો. 

નોંધનીય છે કે વર્ષ 2011માં લીબિયાના તાનાશાહ મોમ્માર ગદ્દાફીને સત્તાથી બહાક કાઢવા અને હત્યા બાદ લીબિયામાં અરાજકતા જેવી સ્થિતિ થઇ ગઇ હતી. વર્ષ 2014થી જ લીબિયાના પૂર્વ અને પશ્વિમી વિસ્તારમાં અલગ અલગ સરકાર અને સંસદ છે અને બંને અલગ અલગ સંગઠનો અને જનજાતિઓનું સમર્થન પ્રાપ્ત છે.